प्र्हेंस्यो “तमरे भन्दा ङ्योमरे सैँ तोईं” बिब शिर्षक थेंसी चु सैंरबै ताँ प्रिमरे फेरी भर्खर बै प्र्हेंस्यो जि खे सैंरबै ताँ प्र्हिना अबिद् ओ। खास ङ भर्खर बै प्र्हेंस्यो आङ्हीं। प्र्हेंस्योम् ङै जिन्दगीर स्योमन् तिबार तल खाँब या। र्हों्सै पलर प्र्हेंस्यो खैले तै बिब ताँ तोगो चुर बियाँनरे कोलोमै ल्ह्योंबा ताँ धोंबे तमु। स्योर आतेनाले बिल तुमरे ङ लाजे प्र्हेंस्यो फिलिमर् बै मायारनील् धोँल्ले, बेले बाजा र्हाइ थेब ब्या लब धोको मुला तर स्योंमा ङै पलर् खै तो आक्र्ही तो आक्र्ही, बाजा र्हााई थेब ब्या लल आता रो बिई, लाउरे ने बालो लाउरे तालर् बै ब्या तै। खैले ब्या तना बिलेन आखिरी जिन्दगी थोबा प्र्हेंस्यो ने ब्यौलान् या। छदै ङजि र्होंस प्र्हेंस्यो तमरे बै ताँ लगभग स्युम्लेल् खाँला। तर यूकेर उईं भखर तब प्र्हेंस्यो फिलिमए प्रिमियर शो जि दान प्र्हेंस्योमै स्योम्बै ताँ (अतित) लाई आलो(ताजा) लवाइ।
छदै प्र्हेंस्यो फिलिम ङ्ह्योब लियाँई ङै सैंर म्हेंब ताँ तमु क्युइर् प्र्हिबा भों (कोशिस) लैमु। तमु क्युइ र्होँ-र्होंसै नास ट्हो अन्सार स्यो-स्योबै तम्। खनिजेइ ताँ क्युइ आकृयाँ माफ भिन् ओ।
जिन्दगीए घ्याँर प्र्हदै ह्यामा र्होंसै ह्युल पिथेंसी यूकेर खै टिमरे तमु धीं यूकेरबै सदस्य तब मौका योईं। झाले धींर बै क्रथेब म्ही थेब जोगोने बालो के लब मौका योईं। तिगें तमु धींरबै सल्लाहकार (ताँ लोबै म्ही थेब) एकेन्द्र आवाजी फोन लैबिरी " बैनी ङ्यी तमु क्युइर बै फिल्म प्र्हेंस्यो भइमु, केमे तानैन ङ्योभिल तुइ" बिई। ङै तम तम आवा (दाजु) बिई। तर धींर खै कोलोमैलाई प्र्हेंस्यो फिलिम ङ्योबर ह्याले बिमारे,"आ....... नेपाली फिल्म जस्तो भए त बोर लाग्छ।" बिसी आङ्यें। कोलोमै आङेसेरे ङै कर अलैदि।
सैं न्होंर ङलाजे कोलोमै बिब ताँ ठीकन् तले खाम् ङ्हाईं। तर र्होंरस तमुमै बनिदिब तमु क्युइर बै फिलिम खैबे मुना बिलेइ ङ्योल तुम् ङ्हाईँ। तले बियाँ ल्हे धरी म्ही जगै तिनाँगा तमु क्युइ पोंल आरा, कोइ कोइ तमु क्युइ कोलेईया पोँल आरा। छदै र्होंतसै क्युइ, र्होंसै खे-खेमाए पलकोदों म्हाँदिबै प्ये, छ्या, ल्हू जोगदिल तुम। चै लागि तमु क्युइर बै फिलिमई बेले ल्होम।
याबा तङ्ही दिन(आइतबार) जुन ट्हु तारिक ङेसर ङि (ङै प्युँ ने ङ) प्र्हेंस्यो फिलिमए प्रिमियर शो ङ्योबर फानबोरोर बै र बै ओक फार्म कम्युनिटी स्कूलर ह्याला। अभियान फिल्म्स पोखरार बै ब्यानरर बन्दिबा फिलिम ‘प्र्हेंस्यो’ ए कथा प्र्हिब के (लेखन) ने निर्देशन लोक बहादुर तमु ने वेद बहादुर तमु (श्याम) जि लना। फिलिम बनिदिब म्हिमै (निर्माता) एकेन्द्र तमु, दिलिप सिं तमु, सत्य घले, ओम प्रकाश तमु, विजय तमु, लोक बहादुर तमु ने वेद बहादुर तमु (श्याम) मुना।
ङि चर फेनेमरे म्ही बैरो, धीं न्होंर, ल्हेन खागु तल खाँला। तिस्या देमै फिलिम बनिदिबा म्ही थेब एकेन्द्र तमुजी फिलिम बारेर बै ताँजोगो बिदै फिलिमै कथा प्र्हिब के(लेखन) ने निर्देशन लब लोक बहादुर तमु, वेद बहादुर तमु ने अरु कलाकार जगए ङोसे मिंसे लै। कथा प्र्हिब म्ही(कथाकार) ने त्हिजी क्र्हों( निर्देशक) लोक बहादुर तमुजी, तमुमै म्हयाबर होंबा तमु क्युइ ने ङ्योए प्ये छ्या ने ल्हू जोगादिबै लागि तमु फिलिमजी रिकड थेंबा के लम बिई।
झाले तमु धीं यूकेर् बै क्र थेब सुबसिङ तमुइ, तमुक्युइर फिलिम बनिदिबरी र्होंेस तमु क्युइ, तमु प्ये, छ्या ने ल्हु जोगदिबै लागि छ्याँबा के लब अभियान फिल्म्स पोखारर बै तान म्ही थेबमै लाई छ्याजलो लदै तमु धीं यू के नेरो खे तर्फ उईंले मुइ ने अशिमाला भीईं।
झाले सुरु तै, तानन ङ्योब म्हीमै (दर्शकहरुले) प्रेँबा फिलिम प्र्हेंस्यो। सुरु तमरे लोताँ(कहानी) झ्वाट्टले कोबा गारो तन बिले च फिलिमर बाजे क्र्होंए च्ह मुख्य चन्द्रजङ ने मायारनीए ब्या खैबे अवस्थार तै बिब ताँ बेले गुप्ती (रहस्य) बनिदिई लियाँईं विंब (प्रस्तुत लब) तरिका छ्याँब म्हाँदिई। फिलिमए म्ध्यान्तर ओसोंबै भाग भन्दा लिंईंबै भाग छ्याँबा मुला। फिलिमै कहानी नाँसरबै बेले प्लोबा, योँबा ख्युबा क्र्होँए च्ह ने ब्वारीबै वरिपरी स्युरना बिले समाजर छ्याँबा सन्देश भिंब खालरबै मु।
अभिनय पक्ष ङ्योमरे प्र्हेंस्यो ने ब्यौला (मूख्य हिरो हिरोनी) मै भन्दा पा भट्टी चलिदिबा सैंली ने मुख्यए अर्दली त्होर्जेबै अ
भिनय प्रशंशा लब खालर बै छ्याँब मु। झाले बाजे क्र्हों ने बजे क्र्होंस्यो, मायारनीमै आबा-आमाए अभिनय छ्याँबा मु। चु फिलिमर हिरोमै बिस्याँ, बल्ल पक्का हिरो बिब स्वैदिबा भखर बै फ्रेंसीमै मुना। हिरोनीमै मायारनी दे छ्याँबरनी, मिं अन्सारबै म्ही स्वैदिबा थेँना। छायांकन पक्षे छ्याँबन मु। सिन जोगो बेले छ्याँबा मु तर कोइ कोइ ल्ह्योर मेक अप (नकल तेब) दे अङ्हेबा तमरे हिरोनी मै उमेर भन्दा दे पाको म्रोइमु। कहानी छ्याबन तना बिलैया कोइ कोइ ल्ह्योर दे मेसो आक्र्हीबिरी ओसोंबै ताँ हुगी लियाँईंबै ताँ चीइ कल्पना लब हो छ्योंलो फ्रेब गारो मुला। क्वै जग दान छ्याँबा मु।
खैतना बिलेइ, क्वै ने नाचर नेपाली ने हिन्दी फिलिमर धोंले मसला झोंबर निर्माता, निर्देशक लिसों अपर्दिइमु। न्हेबा (द्वन्द) क्र्होंसेदे धोबे (स्वभाविक) छ्याँबा मु।
तर चु फिलिमै मिं प्र्हेंस्यो थेना बिलेइ तमुमै चलन चल्ती अन्सार ब्या लमरे खै खै लमु बिब ताँ छयान्ले विंल आखाँबा चु फिलिमए कम्जोरी मु। उदारणै लागि प्र्हेंस्यो धींर हुल्दिब बेलार, ब्या लब भन्दा ओसों ब्या कर्म ङ्योमरे पन्डितने मात्र अङ्योन्ले तमु चि, लामा या पज्युने बालो ङ्योयाँ छ्याँब तमला। प्र्हेंस्यो धींर हुल्दिब बेलार बन्दु र्हाफबा, धीं न्होंर झोमरे बै अरु चलन जोगो, झाले दुलानी त्होबा चलन जगै विंयाँ झन छ्याँबा तमला।
प्र्हेंस्यो फिलिम पुरानो धारर बन्दिबा नेपाली ने अरु तमु चलचित्र भन्दा स्योबै र्होंुसै नाँस ट्होर बै कथालाई आधार माँदी बनिदिबा दान उमेरर बै म्ही ङ्योब खालर बै स्तरिय फिलिम मु। प्र्हेंस्यो फिलिम तानन(समग्र) ङ्योमरे छ्याँबा मु। फिलिम ङ्योल खाँबा लियाईं क्वैबै सि.डि. किंकिं ङ्हाँबा म्हीजोगो( दर्शक) ल्हे म्रोईं।
फिलिम ङ्योब भन्दा ओसों ङै सैंर शंका मुला, खनिई हिन्दी फिल्म उपहारए नकल उतार्दिब नेपाली फिल्म बेहुली धोंबै तोन्तो बै फिलिम गा मुइ उ बिसी। तर फिलिम ङ्योब लियाँईं ङ बेले सै तोईं। झाले सैँ न्होंर म्हैं.....जमानर ल्हे म्हीलाई विद्या भिंबा ल्हे खेबा प्र्हिबा, र्हपबा मास्टरमै(गुरुहरु) लोक बहादुर तमु, एकेन्द्र तमु ने वेद बहादुर तमु (श्याम) धोंबै म्हिमै त्हुँई बनिबा फिलिमलाई हलिवुड, बलिवुड ने कलिवुडए नकल तेल आतु।
बरु भखर कराँबा तमु चलचित्र उद्योगए लागि चु फिलिमलाई उन्नती उईँ लम्कदिबा क्र्ही पाइला म्हाँदिल तुम। प्र्हेंस्यो ङ्यी धोंबै क्र्होसेनबै (वास्तविक) जिन्दगीर बै पुरानो प्र्हेंस्योमै मात्र आङ्ही नयाँ प्र्हेंस्योमै, फ्रें छमिमै, आबा आमामै, बाजे बज्येमै दानैन ङ्योयाँ छाँबा तम।
Subscribe to this comment's feed
